繼續掛羊頭賣狗肉之其實話就話推介書戲歌，實際上都係講自己嘅人生哲學同分享吓自己係點樣睇歷史。要了解而家香港嘅問題，一定要明白二戰之後嘅世界形勢，但要明白其實又至少要由蘇聯日本相爭講起，然後講俄羅斯變局又要講到去歐亞大陸嘅局勢，繼續講落去又唔可能迴避基督教世界同伊斯蘭世界嘅往事blahblahblah。所以，如果大家對香港點解係香港有興趣，不妨跟住我嘅推介同思路追溯上去，或者有一日你睇返我個blog，就會突然有豁然開朗嘅感覺。
------
借教宗之口再次回顧殘暴而漫長嘅二十世紀：《教廷白煙》
因為由英國統治，天主教對香港社會嘅影響從來唔及基督教重大，但《教廷白煙》並唔係一齣需要有深厚天主教信仰背景至睇得明嘅電影，因為所有正當宗教其實都係指向普世皆同嘅道理，以導人向善為目標，只要心中存有善念，自然可以投入其中。宗教從來都係人心嘅集體意識呈現，有善良嘅人就會有善良嘅教會，而解經之人一代接一代咁不停更新對神聖經典嘅詮釋，正反映出時代精神會隨時間流逝而一直轉變，所以每個重大決定到底係富有勇氣嘅轉變抑或係隨波逐流嘅妥協，正係導演Fernando Meirelles嘅人文關懷所在。
電影之中，將會成為新教宗方濟各嘅Bergoglio親近群眾，銳意改革，因為不滿教會之保守作風而決意辭任布宜諾斯艾利斯總教區總主教一職。然而，當時在任嘅教宗本篤十六世則對佢相當欣賞，所以就邀請佢同自己深入交流，同時畀佢感受身為教宗嘅責任重大。雖然電影完全係一套文戲，但因為兩位主角演技迫真，導演對節奏嘅掌控亦非常流暢，兩個角色由起初無法理解對方到其後因為信仰而惺惺相識，互相開導之過程令人感動。
睇埋落去：https://bit.ly/3fnxYct
Search